GEGURITAN

  

AJA WAS NIMAS

godhong esuk ngreda ngelus-elus mangsa

jantra  mubeng ngrabuk lungite rasa

impen esuk tumiyung

mumbul ngawiyat mburu mega biru

malang megung kesileb wuru

kekidung tembang lan  tembung asmara

ora  bisa enda

nalika keplase  warastra

titis nunjem pulung dhadha

bethari Ratih

--njelih

--ngrintih

Pupus godhong  gogrog

gugur tumumpang ndhuwur lungur

rembulan  nglegena wudhar tanpa tapih

diyu kesusu

nggaglag  nadhah kala  mangsa

patang candra

kawistara

"manis

aja tetawang tangis..

iki ana japa tanpa mantra"

(duren ,seprait apa nanas)

 sumpet pamungkas

 aja was nimas

*** Panggul-Trenggalek

(Kapacak ariwarti Djaka Lodang)

 PEPES

Dening: St. Sri myani

langit sing ndak rakit kadya gurit

saiki wis njerit

dakburu karo kalbu

dakcandhak  sarosaning awak

ning panggah ora kuwawa

malah nyempyok wani

nunjem sanjerone  iga

dhuh dewa,

sakjane aku kudu wis rumangsa

aku kudu isa nggerba

menawa aku iki pancene mung emprit

sing kepengin nganggit gurit ing pucuking langit

kok cumantaka mabur masang tengara ing nggegana

karo ngibarne gendera ana mega

dhuh dawa,

aku tiba

panjangka sirna

saka arah langit angin ketiga ngeses

nggodha sukmaku sing  nggrantes

p e p e s

    ***Panggul-Trenggalek 1989

(guritan iki nate kapacak Majalah Djoko Lodang 1989)

  ING JIWA THUKUL IRAMA

Dening : St. Sri Emyani

wurukku ngrabuk swara-swara

---ngebaki rina-rina

---ngrungkepiwengi-wengi

sakehing tatu lan guyu

malah nyithak kasantosaning nala

ooo, paman

aku isih ajeg lumaku nut cakra

ngupaya tangise lintang lan rembulan

kanthi ngronce lungite ukara

    : dhadhaku ana geter guyu

     : marasku ana peter tatu

(nyawiji : rubeda lan suka dadi tembang wuru)

kelayung sumliwer tembung-tembung

njur, ing jiwa thukul irama

     ***Panggul – Trenggalek 1993

            (guritan iki nate kapacak ing majalah Mekar Sari  8 April 1994)

ING SUNGAPAN

Dening : St. Sri Emyani

ing sungapan ana bathang celeng

njerbabah mangambar anyir

worsuh larahan

--letheg !

--butheg !

ing sungapan ana watu mutiara

sakebo ndhekem

ilang sunare kebendhem bathange kwanda

--pating bethethar !

: bathang – mutiara

padha samyuh ing sungapan jiwa

o, jembar samodrane

o, jembar dhadhane

agung pangaksamane

sungapan hem, sungapaning nurani

sing setya nampa amis lan manise

lelakon

sing wis dilakonake

panjenengan-Ne

     ***Panggul – Trenggalek 1993

     ( Guritan iki nate kapacak ing majalah Mekar Sari 1994 )

           NASAK

Dening : St Sri Emyani

wengi-wengi

lelayaran kita tanpa wates

o, nimas !

kita wis nasak alas

nyabrang  ilining kali madu

aku wuru mabuk ing pangkonmu!

o, nimas !

kene-kene ndak bopong

lelayar ngawiyat ndhodhog korining kamasih

-adhuh aku kelipyan-

wengi-wengi

sukmaku ing pangkonmu

nadhahi ilining luh-luh suci

o, nimas

ngapa kita nasak

sadurunge tekan mangsakala

aku wuru !

mas mas

wis ana telung candra

mbulane panglong

pange mendhelomg

oh !

kepriye ?

“ aku wirang Kakang”

( oh cah ayu, kridhaning pesthi

mung penjenenganNe sing kwawa nggarisake )

nalika jago-jago padha kluruk

iki lamarane

hem, cah ayu!

kembang taman ngarep wis wayu

kasasak gurit wuru

NAFSU!

     ***Panggul- Trenggalek 1993

    ( Guritan iki nate kapacak ing majalah Mekar Sari 19

   PELUH

Dening : St Sri Emyani

wis utah angin sukma

ing sadawane ratri

njur, nalika samun ungak-ungak

ing randhuning angga

yitmaku angluh

-peluh-

wis ndak suntak

ing sanjerone kepis

wulan, candra, kartika

-nyawiji-

hem, sadawane guritku

ngemban saripatining jiwa

tama

ooo, kadang

edine ketula-tula

bareng pecahe surya

     ***Panggul – Trenggalek 1993

      ( guritan iki nate kapacak ing majalah Mekar Sari  11 Maret 1994 )

WOTING NALA

Dening : St Sri Emyani

yen ta wengi wis nagih sepi

ranggas sukmaku

kepagas

landhepping warastra

 a s ma r a n d a n a

: ngontitake tentreming nala

oh, ranggas !

rikmamu memes

cumondhok ing netraku

kalane, aking ing nuraniku

mbiyaki reroncen mutiara

   a s m a r a n d a n a

: ngiris maras nggada mustaka

oh, kantaka !

liwung kelangan kaca

minangka pangilon

kalane woting nala aking

nuju bumi mamring

     h e m !

     ***Panggul – Trenggalek 1993

      ( Guritan iki nate kapacak ing majalah Mekar Sari  11 Maret 1994 )

MATI

Dening : St Sri Emyani

wis, ndak elar genderaning jiwa

ing sadawane : marga,gegana, wang lan wung

nyatane tan subur

ooo, tansaya sonya

sepi

mati !

( saben aku wuru; terus ngrerujit

ukara-ukara putih saka wijiling ruh )

tuntas rakiting

mutiara ing mustakaku

nyatane mung tekan samono

pengaji-ajimu o, putu !

ya ta  yitmaku

oncat saka kwanda

utawa gurungku wis ngelih

saka akinging ketiga dawa

--malah werdine ora ana kang nglari

ooo, koncatan generasi

        m a t i  !

     *** Panggul Trenggalek 1993

     ( guritan iki nate kapacak ing majalah Mekar Sari  11 Maret 1994 )

G O G R O G

Dening : St. Sri Emyani

sore – sore :

ana kembang semboja segagang

ceblok tanpa ludira

ooo, tangis tangis tangis

kusung – kusung

bumi dhuhkita !

hem adhi !

ngapa mesthi tetawang

jer saben godhong

ajeg gogrog

ing dina wektu

g i l i r !

yen tengara

wis ngindhit wayah

njur thathit mapag kwandamu

njerbabah

tanpa swala

g o g r o g !

     ***Panggul – Trenggalek 1993

     ( Guritan iki nate kapacak ing majalah Mekar Sari  19 Januari 1994 )

GURIT KEMBANG BAKUNG

Dening : St Sri Emyani

kalane sukmamu wuru

hem, ya mung sliramu ta nimas

sing kwawa nyugatakake panglipuring nala

utawa yen kembang bakung nyiramake amrik sukajati

ndak arasi memes rikmamu

ing sadawane ratri

-ndak ambati ing keliping gegana

-ndak udhal ing sadawane mangsakala

-ndak lela-lela nganti purnaning carita

hem kembang bakung

gurit aking panglipuring nala

ajur keplantrang

ing wang

lelayaran !

(prahara ngadhang ing sawiyare samodra

njur, rempu sukmamu

ninggal kembang bakung segagang )

 nalika ratri amem

mabuk yitmaku ngrakit ukara

sepa lan sepi sing ajeg ndak gegeti

nglelewa ing taman sepi

(hem yen ta lelayaran kita nganti tekan puloning jiwa

ooo, nini, wengi iki isa ngglanik sapejagong

ngenam kidung asmarandana

ratih lan kama mangayubagya)

hem, gurit kembang bakung

lelewa

pindha cakra nembus jangga

hadhuh !

     ***Panggul – Trenggalek 1993

     ( guritan iki nate kapacak ing majalah Mekar Sari 26 Agustus 1994 )

GANGSINGAN

Dening : St Sri Emyani

sauruting kali ndak ubengi

karo lingiring sukma

kanthi raga njebabah

sumendhe ing pang-pang ori

aku wis lila legawa

oh Gusti !

ana ngendi  papane aku umpetan

jer kuwanenku ngluwihi

panase nala

keslomot dahana

wuru kecubung

asmarandana

oh, gusti !

ing telenging bengawan iki

pupus pangarepku

mecaki urip sing keplase

santer kaya bapangan

: ing ndhuwur – laku lakonku ngwasani

                        keplase nafsu birahi

: ing ngisor --  kelangan drajating dhiri

                       morsuh letheking sih panguripan

hem !

urip mung kaya gangsingan

nurut kridhaning jantra

- tanpa kridha ?

- tanpa suwala ?

( aku satria papa sing ajeg laralapa )

     ***Panggul – Trenggalek 1994

     ( guritan iki nate kapacak ing majalah Mekar Sari  14 Oktober 1994 )

GURIT LINGSEM

 

Dening : St Sri Emyani

nalika wulan maya-maya

tidhem sunare tiba ing sukma

ing kana ana ombak laguning ati

asri nglelewa jiwa

njur sewu ukara

dadi sesulihing nurani

thukul subur

ing bentenge dhadha

ooo aku wuru !

awit getih prawanmu

isih mencok ing nala

gumawang ing pangangen

kalane jiwa kita mabur

ing awang-awang biru

njur, aku ambruk !

ora kwawa nadhahi

mangambar wangine sih katresnan kudus

hem, aku iki ta

satria pongah  sing ajeg cidra

menthang gendhewa

ulah warastra

njur, ing sih kang tidhem iki

      guritku malah lingsem

                                   ***Panggul – Trenggalek 1994

                                    ( guritan iki nate kapacak ing majalah Mekar Sari  28 Juli 1995 )

  

 K E R E N

Dening : St Sri Emyani

laguning jiwa ora kwawa nyendhet ilining pesthi

jer lajuning baeta sampyuh

ketrajang gemuruhe angin

-prahara

(kobar sukmaku kepanggang kridhaning nafsu)

nalika ratri kebungkus atise musim

ndak sedhakepake astaku

sukmaku nyawiji ing

pucuking grana

-asate gurungku

tukone segara madu

njur dadi lagu kidunging

ombak katentreman

hem, sang pujangga !

sing ajeg

nekem dhadha garing

awit, reroncene ukara

     mati tanpa rinokti

          ***Panggul – Trenggalek 1994

          ( guritan iki nate kapacak ing majalah Mekar Sari 3 Pebruari 1995 )

TEMBANG  GURIT  KAMERDHIKAN

Dening : St Sri Emyani

ndak ungalne dhadhaku, kongas !

swaraku sentak nanggor bumi :

        m e r d h e k a !

(nganti gurungku serak, kasadan ukara )

njur, ndak jumputi lelakon-lelakon klawu

          -ayo nyedhaka raseksa

          -iki aku satriya tama

          -ndak babat karo lungite ukara

        m e r d h e k a !

(tembangku ngumandhang ing lurung-lurung, dijumputi semut-semut kampret haha ha ha ha ha )

bumiku bumi biru

ndak dhadhaki kari lingiring ati

karo pangrasane jiwa

          -raseksa laknat

          -aja dumeh pangwasa

          -ayo bandayuda

(ndak sebari ukara-ukara kudus ing sadawane lemah-lemah ngare,

lemah-lemah bang : dhimen ditampani carang-carangku

werdine minangka gembolan suci)

   bumiku bumi leluhur

ya aku wis ngerti yen wis merdhika, kanca

ananging ing sadawane cerita isih ana raseksa

kelangan kiblat

       laknat

          ***Panggul – Trenggalek 1993

          ( guritan iki nate kapacak majalah Mekar Sari 8 September 1993 )

GARUDHA

Dening : St Sri Emyani

sukmamu biru

sing ajeg ngronce ukara mutiara

kekidungan ing lemah ngare ing lemah cengkar

ing langit-langit ngawiyat

hem, yen rakitan ukara iku wis nyawiji

-ana guyu kutah

Sastra badhut panglipuring nala

Ooo komedhi !

panase jiwamu

ajang panas

mabur-mabur ing angkasa

adus eluhe surya

sarandhuning jiwa

netesne kringet

-tuk-

njur saka lingiring netramu

netes luh  sadawane kali

-mangsi-mangsi biru dadi guyu-

hem, ora ana mangsa kendhat !

oo panjenenganmu ta garudha

sastra panglipuring nala

panjenengan ta pujangga ketriwal

sing ajeg goreh ing jiwa-kontal—

o sang garudha !

sepine kwandamu jebul nggembuleng

sewu ukara tama-reh pangrasa !

eman-eman yen ing wengi-wengi

sliramu kekitrang

“ADHUH DHIK, AKU DITAGIH UTANG !”

*W A H *

            ***Panggul – Trenggalek 1993

            ( guritan iki nate kapacak majalah Mekar Sari 5 Agustus 1994 )

PACEKLIK

Dening : St Sri Emyani

ing sadawane :

-sawah-sawah

-langit-langit

-wang lan wung

dalanku macet

tanpa wot

o, ranggas !

ing sadawane :

-dongeng-dongeng

-crita-crita

-laku lan lakon

swargaku tanpa kori

kwandaku rowak-rawek kejojoh eri

hem, paceklik !

dhuh Gusti

weninging jiwa

ora kwawa nyuburne

bumi paceklik

ing sarandhuning

kwanda :

Bangka !

           ***Panggul – Trenggalek 1993

           ( guritan iki nate kapacak majalah Mekar Sari  1 April 1994 )

GEGREG

Dening : St Sri Emyani

 molak-malik

kridha nututi gebyaring jaman

budhaya : asor – tanpa segu !

(ngulati langit-langit timbreng)

yen ing kampungku isih ana kidung

oo, manis ; iku mung kampret

sing metu bebarengan kesaput

ilining mendhung

temlawung !

njur ing saben wengi

ndak laga sakethi wesky

aku wuru ! liwung !

( njur ing kono mbrubul ukara-ukara

reroncen mutiara )

“senajan ala iki kececering budhaya, Mas “!

=bena nyecenges=

ing sadawane lesus timbreng iki

dhadhaku ndak tebah

      g e g r e g  !

-bali aku ngadeg jejeg-

(budhaya, tetep ndak dhadhagi karo landheping pangrasa)

                   ***Panggul – Trenggalek 1993

                  ( guritan iki nate kapacak majalah Mekar Sari  1 April 1994 )

ARAK—ARAKAN

Dening : St Sri Emyani

bumi ranggas

gemlewange surya panas

kreta kwalahan narik kwanda

sing pating slengkrah

tintrim !

isih ana ta sihing memitran

yen bumi gonjing

awit semut-semut padha

ulap, gebyaring brana

: dhemit mesem

: iblis ngakak

(aku sumendhe, karo landhep netraku

mandeng grana, kabeh wis pakem-Mu)

saka telenging kutha ana arak-arakan

tetawang diiringake sewu jangkrik, dhuhkita

hem,

sang raja

sang raja

sang raja

gogrog – ngruwat dumadining urip

PATI !

o, aja tetawang ta kadang

jer, tekane pesthi mujudake kwajibane

rat gumelar

yasa-Ne

          ***Panggul – Trenggalek 1993

          ( guritan iki nate kapacak majalah Mekar Sari 1994)

A R A K

Dening : St Sri Emyani

kencana guwayaku

nalika ndak laga sepuluh centhak arak

limbung sukmaku ing mega-mega

njur, sewu tatu manjelma dadi guyu

: manise nimas lathimu

: amrike rikmamu mbok ore

: kwanda ayu ngusap nafsu

(hu hu hu hu hu aku wuru ta ! )

ndak laga maneh

sugatakna ta nimas amrike kembang panguripan

dhimen ngelak sukmaku

tentrem saka ombak maduning asmarandana

wis telung puluh centhak ndak laga

bumi mendhelong

endi kiblatku ?

elor kulon kidul wetan

kelangan tetenger

o alah

aku keblinger

               ***Panggul –Trenggalek 1993

               (guritan iki nate kapacak majalah Mekar Sari 1994 )